青心直說 [胡孟青] 2011 04 13 [轉載]

[size=3][color=#0000ff][b]發展商互片行動啟示錄[/b][/color][/size]
[size=3][color=#0000ff][/color][/size]
由有沙田大圍樓盤唱高開低，似聞到𤓓味，到政府去年底狠下決心，冒得罪地產商之險以 SSD（開徵額外印花稅）辣招壓樓市，到未等及辣招滯後效應，第一滴血先從一個荃灣二手盤中流出，本地銀行恒生（ 011）其實已經率先打頭陣為 H按落閘，變相加息。
然而在市場高唱連加息都話冇有怕之際，一度被形容為地產界 Prada嘅新地（ 016），竟忽然變成佐丹奴（ 709），以市價作賭注，唔再揤牙膏，實行一鋪晒冷推出 324伙元朗新盤尚豪庭，擺到明求量不求價，似要考驗市場購買力。
另一邊廂，長實（ 001）超人亦當仁不讓，實行敵動我動，你有 Midtown時我一樣有 Uptown尚城。之前喺掃管笏同屯門，同一對發展商旗下嘅星堤同海譽已先行過招。今次戰場移師元朗同洪水橋，再度短兵相接，一個既要高尚又要豪，另一個就最緊要夠高尚。

爭相出貨儲彈藥有因
長實無懼新地突襲，以筍價開出洪水橋尚城首批 108伙，雖說價錢筍唔筍要由買家角度出發，但發展商攻心有計，為協助銀両不足即係未能「量力而為」嘅買家增加上車籌碼，實行以「首期定額」出擊，連首期都可以承造二按。
掉轉頭諗，喺內地銀根有緊冇鬆之際，唔少資金在港購物已即時享有賺人民幣轉港幣滙水變相八五折優惠，買磚頭更加唔使擔心限購令。
傳統智慧，通脹降臨要盡快消費，可是放眼所見，不少唔容易出手嘅老牌家族卻在密密沽貨，超人喺業績後除咗再增持赫斯基能源外，未有再增持長實同和黃（ 013），反而更積極套現儲彈藥，如今連一向不急於推盤嘅行家亦加入搶閘散貨行列，究竟意味甚麼？適逢同日來自 IMF嘅警告，加上金管局罕有向銀行發警告信，是否意味大事勿用，且看下回分解。

來源 :HK Portal